Chorus novae Jerusalem

by Fulbert of Chartres

Chorus novae Jerusalem
Novam meli dulcedinem
Promat colens cum sobriis
Paschale festum gaudiis.

Quo Christus invictus leo,
Dracone surgens obruto,
Dum voce viva personat,
A morte functos excitat.

Quam devorarat, improbus,
Praedam refundit tartarus,
Captivitate libera
Iesum sequntur agmina.

Triumphat ille splendide
Et dignus amplitudine,
Soli polique patriam
Unam facit rempublicam.

Ipsum canendo supplices
Regem precemur milites,
Ut in suo clarissimo
Nos ordindet palatio.

Per saecla metae nescia
Patri supremo gloria
Honorque sit cum filio
Et spiritu paraclito.